Bendik (16) fekk tilbake fotballgleda saman med andre med cerebral parese

I mange år har Røa IL vore det einaste fotballaget i Noreg for unge med cerebral parese. Snart får dei ein ny motstandar.

Andrea Rygg Nøttveit
Publisert 17.02.2024 08:02

Denne artikkelen er eldre enn 1 år gamal. Det betyr at noko av informasjonen kan vere utdatert.

Ein versjon av saka var først publisert i Framtida Junior, søsteravisa til Framtida.no.

– Eg berre spelar og har det gøy. Eg diggar dei folka her. Dei er kjempegøye å spela med og eg trivst kvar trening.

16 år gamle Bendik har vore med sidan starten og er stjernespelaren på CP-laget til Røa IL. Han har vore med sidan oppstarten i 2014.

– Eg spelte på Ullern, så gav eg meg litt der og så fann eg gleda igjen når eg spelte her, forklarar 16-åringen.

No trener han fotball seks dagar i veka, både med CP-laget, G07-laget og G19-laget til Røa. I tillegg har han blitt spurt om å kome til Danmark for å trena med eit CP-lag der.

Reiser utanlands for kamp

Cerebral parese (CP) er eit fellesnamn på ulike forstyrringar som vert forårsaka av ein tidleg skade i hjernen. CP ser ulikt ut for alle, men ein kan ha problem med å gå, springa, balanse, finmotorikk i fingrane og tale.

CP-laget til Røa har over 20 spelarar i alderen 8–17 år. Sidan dei lenge var det einaste CP-laget i Noreg, har dei reist til Danmark og Irland for å spela cup.

Trenar Rakel peikar ut retninga for spelarane. Foto: Andrea Rygg Nøttveit

– Det er ei normal gruppe der alle er bestevener og har gode ferdigheiter, så me kan gjera mange ulike øvingar, seier Rakel.

Ho har vore ein del av trenarteamet til CP-laget sidan september i fjor.

Rakel synest det er dumt at dei er Noregs einaste CP-fotballag, men gler seg over at Lørenskog IL er i ferd med å starta eige CP-lag.

– Det er eit fint miljø å vera i der alle har same føresetnadar. Dei kosar seg og får vera i aktivitet.

Sosialt tiltak

– Eg ville møte andre menneske. Nesten heile klassen går på fotball, seier Jonathan (10).

Han har ikkje spelt lenge, men trur han kjem til å halda fram med fotball i mange år.

På beinet har Jonathan ei skinne som hjelper på balansen. På dette laget gjer det ingenting. Mange av dei andre spelarane har også skinne på beinet.

Noregs første CP-lag

Røa IL har i fleire år hatt landets einaste fotballag for personar med cerebral parese.

– Det er meir gøy, enn eit ikkje-CP-lag, forklarar Torstein (9).

Han er ein av dei nye kameratane til Jonathan og går gjerne i duell med dei eldre spelarane.

Etter å ha byrja på laget deltek Torstein meir i gymtimane. Før kvidde han seg, fordi han ikkje ville at andre skulle sjå at han hadde CP.

– Eg ville ikkje at dei andre skulle le av meg og seia at eg var ein kjip unge.

Bendik (16) fekk tilbake fotballgleda saman med andre med cerebral parese

Reiser utanlands for kamp

Sosialt tiltak

Noregs første CP-lag

Relaterte saker

Magnus Carlsen auksjonerer bort «forbodne bukser»

Barnas klimapanel med klar melding til klimaministeren

Då eg var 20: Emil Gukild song Rompa mi med Bjarne Brøndbo