– Eg ville møte andre menneske. Nesten heile klassen går på fotball, seier Jonathan (10).
Han har ikkje spelt lenge, men trur han kjem til å halda fram med fotball i mange år.
På beinet har Jonathan ei skinne som hjelper på balansen. På dette laget gjer det ingenting. Mange av dei andre spelarane har også skinne på beinet.
![](https://framtidajunior.no/wp-content/uploads/2024/02/RoaIL2-e1707636094366.jpg)
Jonathan (10) trur han vil halda fram med fotball. Foto: Andrea Rygg Nøttveit
Noregs første CP-lag
Røa IL har i fleire år hatt landets einaste fotballag for personar med cerebral parese.
– Det er meir gøy, enn eit ikkje-CP-lag, forklarar Torstein (9).
Han er ein av dei nye kameratane til Jonathan og går gjerne i duell med dei eldre spelarane.
Etter å ha byrja på laget deltek Torstein meir i gymtimane. Før kvidde han seg, fordi han ikkje ville at andre skulle sjå at han hadde CP.
– Eg ville ikkje at dei andre skulle le av meg og seia at eg var ein kjip unge.
![](https://framtidajunior.no/wp-content/uploads/2024/02/ROAIL5-e1707636888702.jpg)
Det er både trening og sosialt når CP-laget til Røa IL samlast. Foto: Andrea Rygg Nøttveit