Han skal kjempa mot John Arne Riise og Jan Thomas om å bli Noregs tøffaste kjendis
Håvard Tvedten er klar for «71 grader nord».
Denne artikkelen er eldre enn 1 år gamal. Det betyr at noko av informasjonen kan vere utdatert.
Tevlar mot John Arne Riise og Jan Thomas i «71 grader nord»
Saka var først publisert i Sunnhordland.
Håvard Tvedten (39) har tidlegare gjort det svært bra i konkurranse mot kjendisar på fjernsyn. For tre år sidan vann han TV 2-konkurransen «Best av de beste». I går ettermiddag sat den tidlegare handballstjerna på buss med retning Lindesnes for å gå laus på første etappe av «71 grader nord – Norges tøffeste kjendis».
Vil oppleva naturen
– Eg har blitt spurt om å vera med fleire gonger før, men då har eg svara at det ikkje har passa ettersom eg har vore i utlandet og halde på med idrett, seier Tvedten til Sunnhordland.
Det har altså ikkje stått på viljen.
– «71 grader nord» er det konseptet blant slike seriar som eg har hatt lyst til å vera med på. Her får ein utfordra seg sjølv, og samstundes oppleva norsk natur, noko eg har sakna då eg har budd vekke, seier han.
Kjendisar
I tillegg til Tvedten er følgjande kjendisar med denne sesongen: Carina Dahl, Marthe Kristoffersen, Abiel Tesafi, Karoline Dyhre Breivang, John Arne Riise, Lars Erik Blokkhus, Nadya Khamitskaya Andersen, Jan Thomas og Silje Torp.
– Det er folk frå ulike bransjar, og eg likar godt å møta nye personar, så dette blir veldig gøy, seier Tvedten.
– I tillegg til konkurransedelen skal det bli spennande å bli kjend med nye folk rundt bålet.
Stordabuen legg ikkje skjul på at han har vinnarambisjon. Men å vinna treng ikkje vera det viktigaste.
– Eg har eit avslappa forhold til akkurat denne turen. Ein får så mykje anna i denne pakken, og det skal bli godt å utfordra seg sjølv litt.
Ny jobb
Etter at 39-åringen gav seg som handballspelar, og flytta til Bærum med familien, har han fått ein heilt ny kvardag. No er han konsulent i selskapet Storform AS. Her jobbar han med leiarutvikling.
– Eg har faktisk ikkje tenkt på handball. No synest eg det er kjempegøy å gjera heilt andre ting, seier han.
Innspelinga av programmet starta altså i går, og resultatet får me sjå på TV Norge på nyåret.
