Her er dei dyraste og billegaste kommunane

Her er dei dyraste kommunane

– Sjølv om vi ser store endringar elles på lista, har toppen og botnen vore stabil i fire år no. Sola kommune tronar som vanleg øvst og er dermed den billegaste kommunen å bu i, medan Gjemnes igjen må ta til takka med botnplasseringa, seier Reidd Krohn-Pettersen som er sjeføkonom i Norsk Familieøkonomi i ei pressemelding.

Lista er basert på tal frå Statistisk sentralbyrå, og ser på kor mykje ein gjennomsnittleg husstand betalar i avgift på vatn, avløp, renovasjon, feiing og eventuelt eigedomsskatt. I Sola kommune utgjer desse avgiftene 5 269 kroner, medan folk i Gjemnes må betala 21 008 kroner for dei same tenestene (inkluderer òg 6 300 kroner i eigedomsskatt).

Medan vi tidlegare har sett fleire byar kjempa i toppen, er det no berre Sandnes og Sandefjord som er inne blant dei ti beste. Elles finn vi Oslo på 29. plass, medan Stavanger er på 51. plass, Trondheim på 68. plass og Kristiansand på 245. plass. Bergen har rasa frå ein heiderleg 14. plass til ein 276. plass (av 406 kommunar). Grunnen til dette er innføringa av eigedomsskatt, noko som i dette oversynet gjer at totalsummen aukar med 7 325 kroner.