Bry deg!
Har DU fått eit spørsmål om korleis du har det, og svart at alt er bra medan magen din knyter seg, og du eigentleg vil knekke saman og fortelje at du ikkje har det så bra likevel? Du er ikkje aleine.
Denne artikkelen er eldre enn 1 år gamal. Det betyr at noko av informasjonen kan vere utdatert.
Steller du deg om morgonen, går på skulen eller på jobb, smiler og ler heile dagen, og kjem heim heilt tom på innsida? Du er ikkje aleine.
Vil du skrike med heile deg at du ikkje har det så bra, men du trur at ingen vil høyre, for det du føler er jo ikkje noko viktig? Det er jo så uendeleg mange som har det så mykje verre? Det stemmer ikkje. Det er alltid nokon som bryr seg. Eg bryr meg, for eg har vore der sjølv.
Eg veit du sikkert har høyrt det tusen gonger før, men det hjelper å snakke om ting ein har det vanskeleg med. Det hjelper å sette ord på dei følelsane som ligg så djupt inni deg og gjer kvardagen vanskeleg.
Er du ein av dei som tenkjer at det andre slit med er overdriven søking etter merksemd? At andre overdriv historier for å bli høyrd? Det burde du ikkje være.
Det å lytte til andre kan endre liv. Ein kan hjelpe så utruleg mykje berre ved å være eit medmenneske, og det krev så utruleg lite av deg som person. Alt du trenger å gjere er å lytte. Eg veit, for det var akkurat det eg trengde sjølv.
Faktaboks
Martine er 18 år, kjem frå Høyanger og bur i Sande. Ho har eit engasjement for vanskelege spørsmål og tabu hjå ungdom.
KULTURBLOGG
Kva er viktig for ungdom i Sogn og Fjordane og kva skal til for at desse tema vert sett på dagsorden?
I prosjektet «Mine meiningar på mitt språk», initiert av Sogn og Fjordane fylkeskommune, bloggar ti engasjerte ungdomar om sjølvvalde tema som dei syns er viktig.
Alle bloggane kan også lesast på sfj.no/kulturblogg
