Diktartavla til Kjartan Hatløy
Den 24. steintavla på diktarstien i tunet på Hardanger folkemuseum skal offisielt avdukast under Diktardagen 23. august.
![](https://framtida.no/wp-content/uploads/2023/09/Andrea-Rygg-Nottveit-svartkvitt-e1695973892347-160x160.jpg)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Kjartan Hatløy får prisen Diktartavla 2015 for sitt markante forfattarskap, som starta i 1996 med diktsamlinga «Solreven». Sidan den gongen har det vorte tilsaman elleve diktsamlingar.
LES OGSÅ: – Eit kraftsentrum for poesi i Noreg
Aure og kosmiske krefter
Diktaren frå Hyllestad i Sogn og Fjordane vart for alvor kjent for mange gjennom diktsamlinga «Kjøkkendikt», som vart nominert til Brageprisen i 2012.
Naturmotiva pregar poesien hans, som ofte kan tolkast som eksistensiell. Likevel er dei poetiske framstillingane av hegre, aure, tid og kosmiske krefter ikkje berre bilete på noko anna. Det er snarare desse fenomena sjølve som provoserer fram ei livsundring der alvor og uskyld er like nærværande, heiter det i pressemeldinga.
– Den nyaste utgjevinga, «Mi meinings hus»(2014), kan lesast som eit meisterleg poetisk uttrykk for ei heilskapeleg forståing av tilværet, seier dagleg leiar Geir S. Netland ved Olav H. Hauge-senteret.
LES OGSÅ: – Håpar diktarånda får leva vidare i Hauge-senteret
Hauge sin sti
Diktarstien er plassert i museumstunet på Hardanger folkemuseum på Utne.
Diktartavla skal fremja positiv merksemd om norsk lyrikk og er eit samarbeid mellom Hauge-senteret og Hardanger folkemuseum.
Prisen vert gitt for heile forfattarskapen til ein forfattar og skal over tid fordelast likt på nynorsk- og bokmålspoetar.
Den første dikttavla vart lagt ned allereie i 1992, men stien vart offisielt innstifta i høve Olav H. Hauge sin 85-års dag i 1993. Diktaren frå Ulvik var sjølv med på å ta initiativet til Diktarstien.
Kvar år vert det arrangert ein diktardag ved museet, og ei ny dikttavle vert lagt ned i stien.
LES OGSÅ: Mange bilete – inga sanning
Hatløy og Mozart
Under prisutdelinga den 23. august vil Hatløy sjølv framføre utvalde dikt. Etterpå vert det klassisk konsert med pianist Inger-Kristine Riber og operasongar Ekatarina Kardakova, som framfører Mozart og Haydn.
Bilethoggaren Cecilie Broch Knudsen er ansvarleg for utforming av tavlene.
Faktaboks
Tidlegare vinnarar:
2014 Cecilie Løveid
2013 Arvid Torgeir Lie
2012 Ellen Einan
2011 Maria Parr
2010 Pedro Carmona Alvarez
2009 Ivar Aasen
2008 Eldrid Lunden
2007 Kolbein Falkeid
2006 Ole Paus
2005 Jakob Sande
2004 Jon Fosse
2003 Aslaug Vaa
2002 Anne B. Ragde
2001 Rune Belsvik
2000 Frode Grytten
1999 Ragnar Hovland
1998 Kjartan Fløgstad
1996 Halldis Moren Vesaas
1995 Jan Erik Vold
1994 Robert Bly
1993 Olav H. Hauge
1992 Terje Johansen