Søkjer student som sjef for 8600
Berre studentar får høve til å søkja Noregs tøffaste sommarjobb.
Denne artikkelen er eldre enn 1 år gamal. Det betyr at noko av informasjonen kan vere utdatert.
Konsern- sjef? Berre studentar, takk!
Noregs største bemanningsbyrå, Adecco, treng nye kreftar om sommaren. I år har konsernet avgjort at ein heiltidsstudent skal få styra 600 tilsette og 8000 utleigde vikarar i staden for konserndirektør Anders Øwre-Johnsen.
– Det er utruleg mange unge talent der ute. No ynskjer me å gje éin av dei eit unikt høve til både å læra og visa seg fram, seier Øwre-Johnsen i ei pressemelding.
Godt betalt
Han er ikkje redd for at konsernet skal hamna i trøbbel med ein så ung og uerfaren person bak roret.
LES OGSÅ: Slik får du sommarjobb!
– Eg er heilt sikker på at me vil finne rett person, som både forstår kva for eit ansvar det inneber og som har noko å tilføra. Slik kan me òg få nye idear og tenkjemåtar inn i føretaket. Men eg kjem ikkje til å ta heilt ferie denne perioden, smiler Øwre-Johnsen.
Den tidlegare NHH-studenten vart sjølv konserndirektør som 34-åring, og lovar å hjelpa til med gode råd til den som får jobben.
Vedkomande skal blant anna leia eit nasjonalt toppleiarmøte og førebu budsjettforhandlingar.
Og løna: 100.000 kroner for ein månads arbeid.
Søk tidleg!
Øwre-Johnsen oppfordrar alle unge om å søkja sommarjobbar, uansett om dei finn nokre dei opplever som relevante for kva dei ynskjer å driva med eller ikkje. Nokre søkte sommarjobb allereie for eit halvt år sidan.
– Me ser at jobbsøkarane byrjar tidlegare og tidlegare, og blir stadig proffare. Me får våre første sommarjobbkandidatar når førre sommarjobb er avslutta, fortel konserndirektøren.
LES OGSÅ: Flest humanistar utan relevant jobb
