≡ Meny
Framtida

i samarbeid med ABC Startsida

Tema: Nynorsk, idrett, Dialekt

Therese Johaug får Dialektprisen

Norsk Målungdom deler ut Dialektprisen 2011 til langrennsløparen Therese Johaug.

Svein Olav B. Langåker
torsdag 22. desember 2011 09.07

Therese Johaug får Dialektprisen Therese Johaug på Tour de Ski i Oberhof i fjor. FOTO: Iso76/CC-lisens

– Ho har gjort dialekten frå Dalsbygda til ein del av varemerket sitt og er eit fantastisk førebilete for ungdom over heile Noreg, seier Janne Nygård, leiar i Norsk Målungdom.

Dialektprisen til Norsk Målungdom vert delt ut ein gong i året, og går til offentlege personar som har utmerkt seg på ein positiv måte med bruk av dialekt.

– Sjølv om det i dag er meir akseptert enn nokon gong å nytte dialekten sin overalt i samfunnet, er nokre dialektar mindre aksepterte enn andre. Dette gjeld spesielt bygdedialektane på austlandet, og difor er det avgjerande at personar som Therese Johaug syner fram at desse dialektane duger like godt i det offentlege rom som andre dialektar, forklarer Nygård.

– Kvar gong Johaug kjem til orde på TV eller radio syner ho fram dialektmangfaldet i Noreg på ein glimrande måte. Dialekten er ein viktig del av identiteten til mange, og det å høyre Johaug snakke si dialekt med stor sjarm og sjølvtillit, gjer det enklare for ungdom å halde på dialekten sin, avsluttar Nygård.

Landsstyret i Norsk Målungdom har delt ut Dialektprisen kvart år sidan 2001, og prisen har vorte ein av dei mest prestisjetunge språkprisane i Noreg. Johaug er dialektprisvinnar nummer ti i rekkja, og kjem i storfint selskap med mellom andre Eli Kari Gjengedal, Lars Vaular og Ravi.

LES OGSÅ: Dette er Noregs mest sexy dialekt


Oppdatert: torsdag 22. desember 2011 09.20
Kommentarar



 
ANNONSE: