Dyrepoliti får øyremerkte pengar
Framstegspartiet lovar øyremerkte pengar til det nye dyrepolitiet som skal opprettast.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Her er det ikkje snakk om å ta pengar frå vanleg politiarbeid, ingen av dei andre viktige politioppgåvene skal nedprioriterast. Her er det snakk om å gi meir ressursar til politiet, og øyremerke pengar til dyrepolitieininga. Vi har lovt politiet meir ressursar i åra framover, seier Frps landbrukspolitiske talsmann Morten Ørsal Johansen til Nationen.
LES OGSÅ: FpU: – Dyrepoliti førebyggjer mishandling av menneske
Sør-Trøndelag først ut
Frp kjem dermed Høgre i møte. Stortingspolitikar Linda Hofstad Helleland og nestleiaren i justiskomiteen Anders Werp har begge sagt at det blir feil dersom politiet skal prioritere dyrevelferdssaker framfor anna viktig kriminalitet.
Utsegnene til Ørsal Johansen til Nationen er i strid med det som Frps statssekretær i Justisdepartementet Hans Røsjordet signaliserte i førre veke. Då sa Røsjordet at politiet må klare seg innanfor dagens økonomiske rammer. Ørsal Johansen kommenterer dette slik til Nationen:
– Eg skal ta meg ein prat med Røsjordet, eg.
Det var i førre veke at landbruksminister Sylvi Listhaug (Frp) varsla at regjeringa skal sette i gang eit forsøk med dyrepoliti i Sør-Trøndelag. Deretter er planen å innføre ordninga også i andre politidistrikt. (©NPK)
LES OGSÅ: Cirkus Arnardo droppar elefantane
